مقالات

لما الوشوش تقع ويتعري كل حد علي حقيقته بقلم / نشأت البسيوني " جريده الأضواء المصريه "

• بواسطة المغيرة بكرى
• 2026 Jan 07
• 157

لما الوشوش تقع ويتعرى كل حد على حقيقته
بقلم/نشأت البسيوني 

في وقت معين من العمر بتكتشف انك ما كنتش عارف الناس فعلا وانك كنت شايف اللي حابب تشوفه مش اللي موجود وان في وشوش اتعلقت حوالين قلبك سنين وعلى اول هزة وقعت وفي ناس كنت شايفها جبال وطلعت فراغ وفي ناس كنت شايفها هينة وطلعت من دهب وفي لحظة واحدة تتقلب حياتك وتعرف انك كنت عايش وسط مسرح كبير كله بيلبس اقنعة ويوم ما يقرب منك 

الجد تلاقي كل حد بيبان على طبيعته من غير مجهود تكتشف ان اللي كان بيضحك في وشك كان من جوا بيغار وان اللي كان بيطبطب عليك كان مستني تقع وان اللي كان بينصحك كان بيتسلى بعجزك وان اللي كنت فاكره سند كان واقف يتفرج وانت بتتكسر وما مدش ايده غير لما اتأكد انك ماعدتش قادر تقوم وتفهم انك كنت بترمي قلبك في حضن ناس قلبها حجر وبتحط ظهرك على 

اكتاف ناس هشة اول ما تميل عليها تتكسر وتوجعك اكتر مما كانت الحياة قادرة توجعك وتلاقي نفسك بتسأل هو انا اللي اتغيرت ولا الدنيا اللي كشفت نفسها هو انا اللي بقيت حساس ولا الناس اللي بقت قاسية هو انا اللي ببالغ ولا اللي حوالي ما بقوش يشيلوا كلمة ولا يحفظوا وعد ولا يتذكروا خير اتعمل معاهم وتفتكر مواقف صغيرة عدت بس كانت اشارات واضحة وانت طنشتها لانك كنت 

بتحسن الظن زيادة عن اللزوم لحد ما الوجع علمك ان حسن الظن مش دايما فضيلة احيانا غباء ضروري علشان تفهم النهاية وتبدأ تشوف الحقيقة بعين جديدة عين ما تجاملش ولا تبرر ولا تتعلق ووقتها هتعرف انك كنت محتاج الوجع ده علشان تبطل تتمسك باللي ما يستاهلش وتبعد عن اللي ما يعرفش يعني ايه قيمة انسان بيديك من روحه مش من فمه وتعرف ان الناس بتبان وقتين بس 

وقت ما تملكك ووقت ما تفقدك وقت ما تكون في ايدهم ووقت ما تكون في ضهرك ووقتها تفهم ان معظم اللي كنت شايفه حب كان اعتياد ومعظم اللي كنت شايفه احتواء كان مصلحة ومعظم اللي كنت فاكره صدق كان تمثيل رخيص ومع كل سقوط وش بتتعلم ترجع لروحك وتحب نفسك اكتر وتبطل تنتظر من حد حاجة وتبطل تستنى كلمة من بشر مشغولين بنفسهم وبكل شيء إلاك وتكبر 

غصب عنك وتستقيم غصب عنك وتنضج غصب عنك لحد ما توصل لمرحلة ما تتصدمش من خيبة وما تتوجعش من غدر وما تتفاجئش من رحيل لأنك خلاص فهمت ان كل حد ماشي على هواه وان انت الوحيد اللي لازم تمشي على عقلك مش مشاعر حد تاني وتوصل لمرحلة ما تكرهش فيها حد بس تبعد بصمت وما تعاتبش حد بس تسحب نفسك بكرامة وما تنتقمش من حد بس تسيب الزمن يقول 

الحقيقة وما تطلبش من حد شيء بس تخلي ربنا يعوضك اضعافه وتبقى قوي من غير ما تكون قاسي لين من غير ما تكون ضعيف صاف من غير ما تكون ساذج هادي من غير ما تكون منكسر وساعتها تفهم ان ربنا لما خد منك ناس ما كنوش ليك كان بيفسح مكان لخير أكبر وان الوشوش اللي وقعت ما كانتش خسارة كانت نجاة كانت حماية كانت درس كبير كتبته الحياة بوجع بس بخير 

بعدها وتبص لنفسك بعدها وتقول الحمد لله اني اتوجعت واتعلمت واتصدمت واتغيرت لان اللي اتبنى بعد الوجع ده اقوى وأثبت واحسن الف مرة من اللي كنت فاكره زمان وتمشي طريقك وانت فاهم ان الي بيبعد عنك ما كانش أصلك والي بيقرب منك ما كانش صدفة والي اتكشف قدامك ما كانش غلط ده كان حق لازم يبان علشان انت تكمل طريقك بقلب أنضج وعقل أوسع وروح ما بقتش سهلة الانكسار

• الوسوم
• لما
• الوشوش
• تقع
• ويتعري
• كل
• حد
• علي
• حقيقته
• بقلم
• /
• نشأت
• البسيوني
• "
• جريده
• الأضواء
• المصريه
• "
• لما الوشوش تقع ويتعري كل حد علي حقيقته بقلم / نشأت البسيوني " جريده الأضواء المصريه "