مقالات

وتحسبها ساكنة بقلم / ماني عادك " جريده الأضواء المصريه "

• بواسطة المغيرة بكرى
• 2026 Jan 19
• 23

وتحسبها ساكنة 

بقلم/ناني عادل 

في زاويه بعيده من الدنيا كانت عايشه انسانه محدش فعلا يعرفها زي ما هي كانت تعرف نفسها كانت ماشية وسط الناس بصلابه شكلها من بره يخلي اللي يشوفها يحلف انها متينه زي الصخر لكن محدش يعرف ان جواها موج عالي ما بيهداش ورياح ما بتسكنش وصراع كبير ما بين اللي بتتمناه واللي بتقدر عليه واللي بتستحمله كانت بتسأل نفسها كل يوم هو ليه الانسان بيتولد في معركه قبل ما يفتح عينه هو ليه لازم يمشي في طريق كله شوك من قبل ما يعرف يعني ايه راحه
هي ما كانتش بتدور على بطولة ولا كانت بتدور على اهتمام هي كانت بس عايزه يوم يعدي من غير ما ينكسر فيه جواها حاجه يوم يمر من غير ما الدنيا تفكرها انها دايما أسبق منها بخطوة وانها مهما جريت هتفضل بتحاول تلحق حاجه مش عارفه شكلها لكن رغم التعب ده كله كانت بتقف الصبح وتزق روحها وتقول لنفسها جربى تاني يمكن النهارده يبقى مش شبه امبارح يمكن ربنا شايل لك حاجه بعد صبرك يمكن قلبك اللي اتوجع يرقى مره تانيه
كانت بتقابل الناس بوجه ثابت وابتسامه خفيفه وانا ماشيه على الارض كإنها فاهمه كل حاجه لكن الحقيقه انها ما كانتش فاهمه غير حاجه واحده بس ان الحياه مالهاش امان وان البشر قلوبهم بتتغير اسرع من تبديل الفصول وان الكلمه اللي تتقال النهارده ممكن تتسحب بكرا وان الوعد اللي يديك احساس انك مش لوحدك ممكن يتحول لسراب
ومع ذلك كانت بتكمل كانت بتمشي في طريقها من غير ما تبص وراها كتير يمكن لأنها اتأذت بما فيه الكفايه من اللي وراها ويمكن لأنها فهمت ان المستقبل هو المكان الوحيد اللي ممكن تلاقي فيه نسخه أحسن من نفسها كانت عايشه ما بين تردد وخوف وجراءه ما حدش بيعرف عنها حاجه جراءه انها تقوم كل مره رغم انها بتتمنى في لحظات كتير ترتاح جراءه انها تسكت رغم ان جواها كلام كتير وجراءه انها تحتمل رغم ان الاحتمال بيمزق روحها
هي كانت مطحونه من جوا بس عمرها ما اشتكت كانت بتبص لنفسها في المرايه وتقول انا مش ضعيفه لكني تعبت انا مش مكسوره لكني موجوعه انا مش مهزومه لكني اتأخرت في الفرحه شويه كانت بتكلم نفسها وتقول يمكن ربنا بيجهزني لحاجه فيها خير يمكن كل مره اتكسرت فيها كانت بتبني حاجة جواي اقوى يمكن الوجع اللي سكن قلبي كان له معنى وانا ما فهمتوش لسه
ومع كل دا كانت بتقف على رجليها وتفضل ماشيه كإن الارض مستنياها كإن القدر ماينفعش يكتمل من غيرها كإن الدنيا مهما اتقلّت عليها مش هتعرف تكسرها كانت ست صامده رغم ان الكسور اللي جواها كتيره كانت واقفه رغم ان الريح اللي حواليها عنيفه ومحدش كان فاهم ازاي انسانه بتعيش كل يوم بحرب داخليه ولسه بالشكل ده صامده
بس هي كانت عارفه سر محدش يعرفه كانت عارفه ان القوة مش انك ما تتألمش القوة انك تتألم وتسكت وتقوم وتكمل وان الهزيمه الحقيقيه مش في سقوطك الهزيمه انك تستسلم وهي كان مستحيل تستسلم كانت بتقول لنفسها مهما الدنيا لعبت مهما اتقلّت مهما غدرتي بيا انا مش هقع انا مش هسد بابي انا مش هبطل احلم حتى لو الحلم اتأخر حتى لو الطريق طال حتى لو تعبتي من كتر المحاوله
هي النهارده مش الحزينة الضعيفة اللي العالم افتكرها ولا الصامته اللي محدش سمع صوتها هي دلوقتي نار هاديه نار جوه قلبها بتنور طريقها نار من نوع ما يحرقش الناس لكنه يحرق الظلم نار ما تفرقعش لكنها تدفي روحها البارده نار بتقول انا اتولدت عشان أقوم مش عشان أقع وعشان اربّي في نفسي قوة محدش يعرف يشيلها غيري
هي كانت من النوع اللي يبان ساكن لكنه من جوا اعصار هي اللي لما الدنيا تفتكر انها خلصت عليها بتقوم تاني وتفاجئها هي اللي بتبني نفسها من بقايا جروحها وتقول للقدر انا مش لعبه في ايدك انا درسي في تاريخك انا اللي بتتحرك من غير سند ومن غير خوف ومن غير ما احتاج اشكي لأي بشر
هي ببساطه حقيقه ما تتحكيش لكنها تتحس قوة ما تتشافش لكنها تهز جبل روح ما تتكسرش مهما اتكسرت انسانه اتخلق جوّاها نور ما حدش يعرف يطفيه حتى لو الظلمه قفلت كل الابواب

• الوسوم
• وتحسبها
• ساكنة
• بقلم
• /
• ماني
• عادك
• "
• جريده
• الأضواء
• المصريه
• "
• وتحسبها ساكنة بقلم / ماني عادك " جريده الأضواء المصريه "