فن

تعالوا مع بعض نعرف حكاية يسري مصطفى وزيزي مصطفى!

• بواسطة يحي الداخلى
• 2025 Jul 28
• 111

تعالوا مع بعض نعرف حكاية يسري مصطفى وزيزي مصطفى!

كتب يحي الداخلى 
يسري مصطفى، الممثل اللي كان في عز مجده وقتها، اتجوز زيزي مصطفى سنة 1982.وكانت هي قبل منه اتجوزت وأطلقت مرتين قبل كده، وناس كتير قالوا إن الجوازة دي مش هتستمر، وإن يسري عصبي ومش هينفع يعيش في حياة مستقرة، بس اللي حصل كان عكس التوقعات تمامًا.

يسري بيحكي وبيقول:
"كنت أعرف زيزي من بعيد وهى ممثلة، وكنت دايمًا بحبها في صمت. كانت بتيجي التصوير وتروح من غير ما تتكلم مع حد، وأنا كنت أول واحد أرد على أي سؤال تسأله. وفي مرة، وإحنا بنصور مسلسل اسمه (الضوء الأسود) في عجمان، قررت أقولها إني عايز أتجوزها وفعلاً لما رجعنا اتفقنا واتجوزنا."

يسري بيكمل:
"الحمد لله مكانش عندنا أزمة سكن، لإن بيت زيزي كان موجود وريحنا من اللفة على الشقق، بس أنا زودت فيه شوية حاجات كده عشان أخليه على مزاجنا."

إنما برضه، الناس ما سبتهمش في حالهم يسري بيضحك وهو بيقول:
"فيه زمايل لينا كانوا بيقولوا لزيزي: إنتي إزاي مستحملة يسري؟ ده عصبي جدًا ومينفعش يتجوز أصلاً!، بس زيزي خذلتهم وفضلت معايا، وإحنا أثبتنا لهم إن اللي بيحب بجد بيعرف يعيش."

وكان فيه هزار دايم بينه وبينها، يسري بيقول:
"كنت دايمًا أحب أغيظ زيزي شوية، لأنها لما بتتضايق بتبقى جميلة، فكنت أتعمد أضايقها كده هزار… وناس كانوا يهزر يهزروا و يكلموا علينا كإننا إخوات عشان اسمنا قريب، فيقولولي: أختك زيزي جات، ويقولوا لزيزي: أخوكي يسري كان هنا!"

أما بقى عن البيت والمطبخ؟
يسري كان راجل بميت راجل، بيقول:
"ماحبش الوجبات الجاهزة، بحس إنها إهانة، ولو لقيت الأكل قرّب يخلص، أدخل أطبخ، وأدور في كتب الطبخ لو مش عارف الطبخة. وبعد ما أخلص، أنضف المطبخ كله كأن مفيش حاجة حصلت، بس عندي مشكلة صغيرة مش بعرف أظبط التوابل."

بس القصة الحلوة دي خلصت بوجع…
تغريد فهمي، صديقة زيزي المقربة، حكت القصة من منظور تاني وقالت:
"زيزي كانت بتحب يسري أوي، ولما تعب ودخل المستشفى، قعدت جنبه على طول. وبعد ما ربنا شفاه، مقدرش اللى عملته و اتجوز واحدة تانية من الوسط، والمشكلة إن زيزي ماقالتش لحد وسكتت، لكن لما الموضوع بقى معروف، انهارت وزعلت جدًا؛و التأثير النفسي كان كبير عليها."

تغريد بتقول:
"يسري بعد كده ندم جدًا، وكان بيحكيلي إنه لما يقعد في الشقة اللي أجّرها في وسط البلد، يفتح التلفزيون يلاقي زيزي طالعاله، كأنها لسه معاه. والممثلة التانية اللي اتجوزها، ماكملتش معاه، كانت عايزة شغل وشهرة، ولما ماحققش لها اللي هي عايزاه، سابته."

وزيزى من القهره حالتها النفسية ساءت و فى النهاية ماتت سنة 2008  بنوبة قلبية حادة !
ناس كتير بتقول لأنها زعلت جدا لأنها حبت يسري بجد و ناس تقول قضاء و قدر 
بس الحب أوقات بيزود الحزن من الخيانة و الجرح بيسيب أثر كبير،.

• الوسوم
• تعالوا
• مع
• بعض
• نعرف
• حكاية
• يسري
• مصطفى
• وزيزي
• مصطفى!
• تعالوا مع بعض نعرف حكاية يسري مصطفى وزيزي مصطفى!