مقالات

{ صولو }

• بواسطة يحي الداخلى
• 2025 Sep 10
• 110

{ صولو }

بقلم:سمر يوسف 

كل حد استثنائي نعرفه… كان في وقت من الأوقات "شخص عادي" جدًا، لكن في لحظة مفصلية قرر ما يكملش بنفس الصورة.
اختار إنه مايكونش نسخة مكررة.
سأل نفسه:
إزاي أسيب أثر؟ إزاي أكون مختلف؟ إزاي يكون ليا بصمة؟
الاستثنائى جوه روحه شعلة مغموسة بالأمل والسعي، هي اللي بتنور الطريق له وكأنها طاقة نور.
صحيح كلنا اتولدنا بخليط من المشاعر والإمكانيات، لكن الاستثنائية مش جينات.
والأكيد إن في ناس شخصيتهم فيها بذور تميّز… لازم صاحبها يرويها وينميها لحد ما تطرح.
الاستثنائيين بيمشوا ببساطة، بلطافة، بتلقائية، واللي حواليهم هما اللي بيلاحظوا.
شافوا فيهم نغمة مش بتتكرّر، نوتة موسيقية فريدة وسط سيمفونية الحياة.
النغمة دي مش محتاجة ميكروفون ولا منصّة… النغمة بتوصل من غير ما يتكلموا، لأنها طالعة من جوّه الروح.
الشخص الاستثنائي ماصحاش من النوم قرر يبقى استثنائي، هو فعلًا كده بكل ما فيه من صدق، وشغف، وحب، وطاقة نور.
وده أعلى درجات الاستثنائية.
ماعملش خطة خمسية… كل اللي عمله إنه كان (هو).
وده أصعب قرار في الدنيا… إنك تختار تكون "إنت" وسط عالم بيحاول يخلّيك نسخة منه.
بيعيش كل يوم بنفسيته، بضحكته، بصبره، بخوفه، بتقلّبه، بمحاولاته… ومع الوقت، الناس ابتدت تلاحظ: "إنه مش شبه حد".
وسمع الكلمة دي كتير: "إنت استثنائي".
زي كل فرقة موسيقية فيها صولو… حد بيعرف يعزف لوحده، بيعرف يسيطر على الجو، متفرد.
ويمكن ده بالظبط اللي بيحصل في الحياة. في وسط زحمة العادي، في حد ماشي بنغمته بشكل غير عادي، عايش بطريقته… {صولو}.
الشخص الاستثنائي مش لازم يكون عبقري، ولا خارق، ولا صاحب إنجازات عظيمة.
ممكن يكون بس شخص بيحاول…
الاستثنائي شكله مختلف، صوته مختلف، تفكيره مختلف، حتى طلته مختلفة.
متغلف بحاجة مش مفهومة من عند ربنا كده.
حتى تعامله مع الأمور مختلف، ونظرته للحياة عموماً مختلفة.
الناس يمكن ما يعرفوش يفسّروا ليه بيلفتهم… بس بيحسوا بوجوده.
والناس اللي فعلاً غيروا العالم، كانوا ماشيين في الدنيا بهدوء… بس بنغمة مش بتتكرّر.
كانوا… {صولو}.
S???????????????? ????????????????????????????

• الوسوم
• {
• صولو
• }
• { صولو }