روح الفن بقلم / مرينا حسن " جريده الأضواء المصريه "

مقالات

روح الفن بقلم / مرينا حسن " جريده الأضواء المصريه "

روح الفن

بقلم/مرينا حسن

في عالم الميك اب في ناس تعرف تشتغل كويس وناس تحفظ خطوات وناس تشوف الشغل مجرد الوان وخطوات ودمج وخلاص لكن في نوع نادر جدا عنده حاجه اعمق بكتير حاجه مش بتتدرس ولا بتتلقن ولا بتتقلد نوع من الفنانين اللي اول ما يمسك الفرشة بيبقى مش بس بيشتغل لكن بيعيش حالة كاملة حالة احساس وتركيز وحضور وحب للشغل مالوش تفسير الفنان الحقيقي في الميك اب مش اللي يعرف يعمل لوك حلو لكن اللي يعرف يشوف الجمال اللي مستخبي الجمال اللي محتاج حد يفهمه قبل ما يطلعه حد يحس بيه قبل ما يلمسه حد يستوعب الروح قبل ما يحط اللون الفنان ده مش مجرد فنان هو مراقب وحساس وقارئ وجوه بيعرف يشوف في ملامح كل حد قصة وبيعرف يختار من القصة دي الضوء اللي يطلعه والظل اللي يخفيه والدرجة اللي تعبر عنها كل وجه بالنسبة له مش مهمة تتعمل وتتسلم لكن لوحة جديدة بيبدأ فيها من الصفر كل مره من غير تكرار من غير نسخ من غير ما يكرر بصمة على وشين الفنان ده بيشوف الشخص اللي قدامه قبل ما يشوف الميك اب بيعرف يسمع بدون ما يتكلم حد بيعرف يشوف الثقة الضايعة والهدوء الغايب والجمال اللي محتاج حد يصحيه وده اللي يفرقه عن اي شاطر تاني الشاطر ممكن يحط ميك اب صح لكن الفنان يغير احساس الشخص بنفسه يغير نظرته لجماله يسيب في الصورة انطباع مايتنساش ويخلي كل لوك ليه روح محدش يقدر يقلدها لانها مش معمولة بايدي بس لكن معمولة بقلب وتركيز وشغف وصدق الفنان الحقيقي مش بيعمل شغل كتير لكن بيعمل شغل يعيش الفنان الحقيقي مش محتاج يثبت نفسه لان بصمته سبقه الفنان الحقيقي مش بيجري ورا تريند لكنه اللي بيعمل التريند من غير ما يقصد الفنان الحقيقي هو اللي يخلي كل لمسة رسالة وكل درجة احساس وكل تحول في اللوك نقطة ضوء جديدة في حياة الشخص اللي قدامه وفي النهاية الميك اب مش مجرد شغل ولا مجرد مهنة لكنه مساحة كبيرة جدا للابداع مساحة يبان فيها مين اللي بيشتغل ومين اللي بيخلق فن مين اللي بيكرر ومين اللي بيبتكر مين اللي حافظ ومين اللي فاهم ودايما هيبقى فيه واحد بس اللي يقدر يعمل من اللمسة حالة ومن الملامح حكاية ومن الظهور ذكرى مستحيل تتنسى