مقالات

"باب الأمل مِوارب "

• بواسطة يحي الداخلى
• 2025 Sep 17
• 96

"باب الأمل مِوارب "

بقلم :سمر يوسف 

الأمل هو القشة اللى بيتعلق بيها الغرقان 
القنديل الصغير اللى منور فى قلب نفق ضلمة طويل .
العصاية  اللي بتتسند عليها فى طريق مرهق كله مطبات وحجارة.
إيَّاك تجرِّد حدّ من الأمل… لأنك وقتها
كأنك بتسحب منه روحه 
في ناس لا حيلتها فلوس ولا نفوذ ولا جاه ..كل اللى حيلتهم شويه امل
الأمل دة هو اللى معمر الخراب اللى جواهم 
.عشان الأمل  هو الوقود الخفي اللي بيحرك البشرية كلها لقدام .
 العلماء اللي قعدوا سنين في المعامل لولا الامل كانوا استسلموا من أول تجربة فشلت.
اللي فقدوا أحبابهم لولا الأمل فى الله يصبرهم كانوا انتهوا مع أول لحظة فراق. 
الأمل هو اللي خلّى أمة تقاوم وسط الخذلان اللى واصل لحد السما .
الأمل مش مجرد فكرة وردية… الأمل مسؤولية عليك وعلىَّ
 يعني لو شُوفت واحد مكسور قدامك، ماتزودهاش عليه ، سيب فى قلبه بذرة تصبره وإرويها  معاه لعله يحدث بعد ذلك أمراً 
الأمل مش معناه إن المشكلة هتتحل بكرة،
 لكن معناه انك رميت تُكالك على صاحب النهاردة وبكره .
ماتجردش حد من الأمل 
لما يكون الأمل هو الحاجة الوحيدة اللي باقيه له  وتيجي إنت تسرقه بكلمة إحباط كأنك أخدت منه سلاحه وسيبته إنسان أعزل في وشّ جيش كامل 
ممكن تفتكر إنك واقعي، أو بتنصح "بالعقل"، لكن الحقيقة إنك بتقفل باب الأمل ،باب المعجزات
ربنا نفسه في كتابه العظيم علّمنا إن الأمل في رحمته لا ينقطع:
"قُلْ يَا عِبَادِيَ الَّذِينَ أَسْرَفُوا عَلَى أَنْفُسِهِمْ لَا تَقْنَطُوا مِنْ رَحْمَةِ اللَّهِ"…
لولا الأمل ،مكانش هيكون فى مغفرة  ولا فرصة للتوبة. 
الأمل مش بس سرّ استمرار الدنيا… الأمل سرّ الإيمان.
خلي بالك…كلمة منك تحيي نفس،  ونظرة منك ممكن تنعش قلب، وممكن دعم بسيط منك يخلي إنسان يعدّي جبل لوحده.
وإيّاك، تكون إنت السبب اللي يخلي حدّ يفقد آخر أمل له… لانك هتكون جردته من سبب استمراره 
الأمل أمانة. سيبه في قلوب الناس زي ما تحبّه يبقى في قلبك.
#وزيرةالسعادةツ

• الوسوم
• "باب
• الأمل
• مِوارب
• "
• "باب الأمل مِوارب "