مقالات

???? بين خوف القلب ونور اليقين

• بواسطة يحي الداخلى
• 2025 Oct 28
• 272

???? بين خوف القلب ونور اليقين

بقلم: هبه هيكل

في لحظات معينه من العمر، بنقف قدام نفسنا في حيره غريبه، نحس إن شمس العدل بدأت تشرق من بعيد، وإن ربنا بيبدّل الحال بحال أحسن، بس جوه القلب يفضل الخوف ساكن، مش خوف من بشر، لأ، خوف من الزلل، من لحظه ضعف ممكن تجرّنا لغلط أو تبعدنا عن رضا ربنا من غير قصد.

أنا عمري ما كنت من هواه المعاصي، يمكن أضعف، يمكن أتوه، بس دايمًا نيتي صافيه، وقلبي عمره ما قصد شر. يمكن أحيان بتفهمني الناس غلط، بس ربنا عارف المقصود وعارف النيه.

وأنا مؤمنه إن كل اللي بيحصل حوالينا مش صدفة، ده تدبير من رب العالمين، بيمهد الطرق، وبيكتب الأقدار بحكمته، حتى لو إحنا مش فاهمين دلوقتي. ساعات الخير بييجي في لبس وجع، وساعات الشر اللي بنخاف منه بيكون هو نفسه باب الفرج اللي مستنّينا بعد صبر طويل.

وربنا برحمته الواسعه دايمًا بيبعثلنا ناس تقف جنبنا وقت الضعف، تسند، وتواسي، وتخلينا نحس إن لسه في خير في الدنيا، وإن اللطف الإلهي حوالينا في كل تفصيل صغير.

أنا بطبعي ما بنساش المعروف، حتى لو مر عليه زمن طويل، بدعيله في سري وافتكر صاحبه بكل خير. أما الظلم؟ بسيبه ورا ضهري، مش نسيان، لكن تجاوز وسلام. بسيبه عشان ما يعكرش صفو أيامي، ولا يسحبني لطاقة وجع مالهاش لزوم.

الحياه مهما كانت صعبه، فيها دايمًا أمل، والنور عمره ما بيغيب عن اللي قلبه عامر بذكر ربنا. خليك ماشي بخطواتك الهاديه، واثق إن ربك كاتبلك الخير بطريقته، حتى لو الطريق اتأخر أو لفّ حوالين نفسه.

وقول دايمًا لنفسك:
"أنا في ودّ رب رحيم، بيكتبلي الخير بطريقته، وبيعلّمني الصبر لحد ما يوصلني للنور المبين."


هبه هيكل
صحفية وكاتبة مصرية تهتم بالشأن الإنساني والروحاني، تكتب بقلبٍ مؤمن يرى في الكلمة رسالة، وفي الإحساس صدق النية، وفي الحرف نور يقين.

• الوسوم
• ????
• بين
• خوف
• القلب
• ونور
• اليقين
• ???? بين خوف القلب ونور اليقين