الناس البياعة …. وشوش كتير وضمير قليل

مقالات

الناس البياعة …. وشوش كتير وضمير قليل

كتبت الاعلاميه/ دعاء نور

في كل دايرة حواليك هتلاقي النوع دا من البشر، الناس البياعة، اللي أول ما المصلحة تخلص… تلاقيهم قلبوا وشهم كأنهم عمرهم ما عرفوك
هما مش دايمًا بييجوا في صورة عدو، بالعكس، ساعات بييجوا لابسين وش الصاحب الجدع أو الحبيب اللي بيخاف عليك، لكن أول اختبار حقيقي بيكشفهم.
المصلحة عندهم أهم من أي علاقة
الناس البياعة ما عندهاش قيم ثابتة، عندها ميزان من مصلحتها الشخصية.
لو وجودك بيزودهم مكانة أو فلوس أو راحة نفسية، هتلاقيهم حواليك ليل ونهار
لكن أول ما تحس إنك بقيت عبء أو إن المصلحة خلصت هتسمع الكلمة المشهورة بتاعتهم

أنا مابقتش قادر أكمل كده
بس الحقيقة إنهم مش قادرين يكملوا من غير فايدة مش من غيرك
قلوبهم باردة ومفيهاش ولاء
البياع لما يبيعك ما بيحسش ما بيقفش يفكر هو عمل فيك إيه
بيبرر لنفسه إنه واقعي و بيفكر بعقله
بس الحقيقة إنه جبان بيخاف يخسر نفسه في حب أو مبدأ
وبيختار دايمًا الطريق السهل اللي يضمنله مصلحته حتى لو على حساب الناس اللي حبّته أو ساندته
البياع ممكن يضحك عليك باسم الحب أو الصحوبية
هو بيعرف كويس يمثل
بيتكلم بالحنية وقت المصلحة
وبيبعد فجأة من غير مقدمات وقت الجد
هو بيبيعك وأنت فاكر إنك السبب
بس الحقيقة إنه كان من البداية داخل اللعبة بهدف واحد يكسب هو
ازاي تتعامل معاهم
أول حاجة: ما تديش أكتر من اللازم. البياع بيستغل كرم المشاعر.
ثاني حاجة: راقب الأفعال مش الكلام. اللي بيحبك مش بيختفي وقت الشدة.
ثالث حاجة: اقطع بسرعة. ما تحاولش تفهم ليه باع، لأنك هتتعب، وهو مش هيحس.
وأهم حاجة: ما تندمش. وجودك في حياته كان اختبار ليه مش ليك وانت نجحت هو اللي سقط
في النهاية
الناس البياعة ممكن تكسب الجولة الأولى
بس في لعبة الحياة الطويلة… اللي بيكسب هو اللي قلبه نضيف وضميره صاحي.
لأن الزمن بيكشف والوشوش بتقع
وساعتها اللي باعك هيعرف إنك كنت كنز مبتعوضش

المقال السابق

المقال التالي

التعليقات الأخيرة

اترك تعليقًا

اشترك في النشرة الإخبارية