اشعار وخواطر

اللي بيضحك وهو موجوع

• بواسطة يحي الداخلى
• 2025 Nov 04
• 187

اللي بيضحك وهو موجوع

بقلم/نشأت البسيوني 

فيه نوع من الوجع ملوش ملامح وجع ساكن جوا الروح بيعيش معاك كأنه صديق قديم تعرفه من غير كلام وتحس بيه من غير ما تفتحه
وجع غريب لا هو بينتهي ولا هو بيتكلم كل اللي فيه إنك بتتعلم تعيش جنبه كأنك بتتعايش مع غصة في صدرك بتتنفس وجعها في كل نفس بس ما تقدرش تقول لحد أنا موجوع

في النهار تلبس وش الفرح وتضحك مع الناس وتخبي الحقيقة كويس جدا
تضحك وانت من جواك بتنزف وتهزر وانت نفسك تبكي وتمشي بينهم كأنك مش شايف كأنك مش حاسس كأنك مش مكسور من جوه
الكل بيشوف ضحكتك بس محدش بيشوف المدى اللي بعدها بيبدأ الانهيار
تضحك علشان محدش يزعل علشان اللي بتحبهم يفضلوا شايفينك بخير بس في الحقيقة أنت بتنهار بهدوء في سكون ما بيسمعوش غيرك وربك

الليل عندك مش زيه عند الناس الليل عندك ساحة مواجهة بينك وبين نفسك بينك وبين وجعك اللي مكبوت من زمان
الليل هو الوقت اللي بتخلع فيه كل الأقنعة وتقعد لوحدك وتواجه الحقيقة اللي بتهرب منها طول النهار
بتقعد في ظلمة أوضة وسكونك بيكسر فيك كل الحيطان اللي بنتها الضحكة الكدابة
تبص للسقف وتقول لنفسك كفاية تمثيل أنا تعبت
تنهار شوية وتبكي شوية وبعدين تمسح دموعك وتقول بكرة يوم جديد وأنا لازم أضحك تاني

وكل يوم نفس السيناريو نفس الوجع نفس التمثيل نفس الصمت اللي بيخنقك بس ما تقدرش تبوح بيه
لأنك عارف إن البوح ساعات مؤلم أكتر من السكوت وإن الناس مش دايما بتفهم اللي بيحصل جواك
ناس هتسمعك من باب الفضول مش من باب الفهم
ناس هتشفق عليك وده آخر حاجة نفسك فيها
وناس هتقولك اهدى كله هيعدي وكأن الكلمة دي كفيلة تشيل من على صدرك وجع سنين

اللي بيضحك وهو موجوع هو أكتر إنسان بيتعذب بصمت بس برضه أكتر إنسان عنده قلب نضيف
بيخاف يوجع غيره فبيخزن وجعه جواه
بيخاف يبوح علشان ما يخسرش اللي حواليه
وكل مرة بيتكسر بيجمع نفسه لوحده ويرجع يضحك تاني كأن ما حصلش حاجة

هو مش ضعيف لأ ده أقوى من اللي بيصرخوا
لأن اللي بيصرخ بيريح إنما هو بيكتم الوجع جواه ويحارب العالم وهو ساكت
بيكتم كلمته علشان ما تجرحش حد وبيخفي دموعه علشان ما يشيلش حد همه
هو اللي بيطبطب على الكل وما فيش حد بيطبطب عليه

وفي لحظة ما محدش بيشوفها وهو بينه وبين نفسه بيقول يا رب أنا مش قادر أكمل كده
وساعتها بس بيحس إن في حد سمعه بجد
مش إنسان لا ربه
اللي عارف كل اللي جواه اللي شايف اللي محدش شافه واللي سامع الوجع اللي ملوش صوت

وتمر الأيام ويتعلم يضحك من غير ما يتألم ويتعلم إن الوجع مش دايم وإن الله دايم فوق كل تعب
ويتأكد إن كل مرة وجعه فيها سكت ربنا كان بيكتب له راحة جاية راحة ما بعدها وجع

فيا اللي بتضحك وانت موجوع اعرف إن دموعك مش ضايعة وإن صبرك مش منسي
اللي بيخبي وجعه عن الناس ربنا بيخبيه هو عن كل وجع بعد كده
هييجي اليوم اللي تضحك فيه بصدق وتبكي مش من تعب لكن من فرحة لما ربنا يوريك إن كل الصمت اللي عشته كان لحكمة وكل وجعك اللي كتمته كان طريق لراحة ما توصفش

ابق طيب زي ما إنت ووجعك خليه جواك لله مش للناس
لأن اللي خلق الوجع هو اللي بيشفيه واللي شاف دمعتك وانت ساكت هو نفسه اللي هيعوضك يوم ما تبكي من الفرح

• الوسوم
• اللي
• بيضحك
• وهو
• موجوع
• اللي بيضحك وهو موجوع