مقالات

يوسف عبداللطيف.. حد كان فاكر الناس صح

• بواسطة يحي الداخلى
• 2025 Nov 15
• 120

يوسف عبداللطيف.. حد كان فاكر الناس صح

الناس فاكرة إن أي علاقة اسمها "صحوبية" وخلاص .. بس الحقيقة إن فيه فرق كبير بين المعرفة والزمالة و الصداقة.

المعرفة .. ناس نعدي على بعض في الحياة. كلمة سلام أو موقف وخلاص.
الزمالة .. ناس تجمعنا شغل، دراسة، مصلحة، ظرف ولما الظرف يخلص، كل واحد بيرجع لدنيته.
لكن الصداقة .. دي حكاية تانية خالص.

الصديق مش كلمة وخلاص .. الصديق روح بتسند، وكتف يتشال عليه، وحد يطبطب عليك من غير ما تطلب. 
الصديق اللي تحكيله من غير ما تخاف، وتسكت جنبه من غير ما تبرر. 
الصديق اللي يعرف قيمتك من قبل ما تتكلم، ويشيلك في ضهره وقت ما الدنيا تديك ضهرها.

أكبر صدمة؟
إنك تبقى بتعامل حد بقلب أبيض، وبتحطه في مكان كبير وفي الآخر تكتشف إنك ولا حاجة عنده.
إنك تفتحله أبوابك وهو قافل بابه من ناحيتك.
إنك تديه قيمة وهو شايفك رقم زيادة في حياته.
ساعتها بتحس إنك فاهم الدنيا غلط، وإن الطيبة ساعات بتوجع أكتر ما بتفيد.

والندالة؟
ندالة الصديق مش شبه أي ندالة لأنها بتيجي من حد كنت فاكر إنه ضهرك، فتيجي الضربة من أقرب نقطة.
الخيبة بتوجع، بس في نفس الوقت بتفتح عينك .. بتعلمك تفرق بين اللي كان موجود لمصلحة، واللي كان موجود بقلب.

مش بكتب الكلام ده عشان حد بعينه، اللي شايف نفسه، يبقى يمكن عارف هو عمل إيه.
إنما أنا بتكلم عن الصديق اللي اسمه كبير، ومعناه أكبر، واللي وجوده يغير حياتك وغيابه يغير قلبك

• الوسوم
• يوسف
• عبداللطيف..
• حد
• كان
• فاكر
• الناس
• صح
• يوسف عبداللطيف.. حد كان فاكر الناس صح