حين يختبرك القدر بما لم تتخيله يوما

مقالات

بقلم/نشأت البسيوني

حين يختبرك القدر بما لم تتخيله يوما تلاقي نفسك واقف قدام لحظة مكنتش مستعد لها لحظة بتقلب الموازين وتعيد تشكيلك من الأول وكأن الحياة قالت لك دلوقتي دورك تعيد قراءة نفسك من جديد تعيد ترتيب دواخلك وتختار أنت هتكمل إزاي ومن غير مين ولما يجي الامتحان اللي ملهوش إجابات جاهزة هتعرف إنك قدام محطة مش أضعف من اللي فات لكنها أعمق وأصدق وفيها حقيقة

كان لازم تعرفها في الوقت المناسب ومع اللحظة دي بنشوف الوشوش على حقيقتها اللي كان بيضحك كان بيضحك علشان صورة واللي كان ساكت كان ساكت علشان مصلحة واللي كان قريب كان قريب علشان استفادة مش علشانك انت ولما الوجوه تتكشف والقناع يقع هتعرف إنك طول عمرك كنت بتدي بأكتر من طاقتك لناس عمرهم ما شافوا قيمتك وإنك كنت بتسند ناس ما

شالوكيش وإنك كنت بتبرر للي ما يستاهلوش تبرير وإنك كنت بتجمل مواقف ما ينفعش تتجمل أصلا ومع كل ده تكتشف إن الوجع مش عقاب الوجع رسالة رسالة بتقول لك فوق راجع نفسك احمي قلبك حافظ على روحك وما تديش ما تبقاش محتاجه ولا تبذل جهد في طريق مش طريقك ولا تنتظر من حد يقدر اللي انت بتعمله مدام هو أصلا مش شايفك ولما اليقين يدخل قلبك إنك كنت

بتتعلق بخيوط ضعيفة هتعرف إن القطع كان رحمة مش خسارة وإن الرحيل كان إنقاذ مش نهاية وتبدأ رحلة جديدة رحلة فيها انت الأول فيها احترامك لنفسك قبل رضا الناس وفيها قوتك مش في الصوت العالي لكن في الثبات وفيها قراراتك مش بتتخذ من خوف لكن من إدراك إن مفيش حد هينقذك غيرك وإن السلام اللي بتدور عليه مش بره السلام جوه بينك وبين نفسك بينك وبين الماضي

اللي خلاص قفل صفحته وبينك وبين مستقبل عايزك بس تمشي له وأنت خفيف ولما تراجع خطواتك هتعرف إن ربنا دايما بيحطك في الامتحان اللي يناسب قلبك الامتحان اللي يخرج أجمل ما فيك أو يخرج أقوى ما فيك أو يخرج أصدق ما فيك وهتحس إنك مش نفس الشخص اللي دخل الأزمة وإنك طلعت منها بنسخة نضجت من غير ما تقسى ووعت من غير ما تكره واهدت من غير ما تنكسر

وقررت من غير تردد وفي نهاية الرحلة دي هتكتشف إن اللي فضل معاك كان أصيل وإن اللي اختفى كان مؤقت وإن اللي استهان بيك كان لازم يمشي علشان يتفتح لك باب لناس أرقى وأنضج وأصدق وإن اللي ضاع منك ماكانش خير ليك وإن الخير دايما بيظهر بعد ما تهدأ وبعد ما تفهم وبعد ما تقرر تمشي من غير ما تبص وراك وحين ترفع راسك بعد الاختبار الأخير هتعرف إنك أقوى مما كنت تتخيل

وإنك أعمق مما كنت تظن وإنك قادر تبدأ من جديد من غير خوف ومن غير تردد ومن غير ما تكون محتاج رأي حد علشان تثبت لنفسك إنك تستحق لأنك ببساطة تستحق

المقال السابق

المقال التالي