العزلة اللي بنختارها بإيدينا

مقالات

بقلم/نشأت البسيوني

في ناس بتتخبط في الدنيا غصب عنها وفي ناس بتنسحب بإرادتها وتنزل من السباق من غير ما حد يفهم ليه ولا إيه اللي حصل جواها علشان تاخد القرار ده واللي ما يعرفوش إن أكتر انسحاب في الدنيا مش ضعف ولا هروب أكتر انسحاب في الدنيا بيكون لحظة قوة لحظة وعي لحظة إنقاذ للنفس قبل ما تغرق وتضيع وتتحول لإنسان تاني مش هي العزلة اللي بنتكلم عنها هنا مش عزلة الأماكن دي

عزلة الروح عزلة بتخليك تقفل بابك وتقفل قلبك وتقفل ودنك عن الضوضاء اللي كانت بتستهلك جزء من عمرك كل يوم من غير ما تحس عزلة بتاجي بعد سنين من محاولات بائسة إنك تفهم الناس تفهم محبتهم تفهم تقلباتهم تفهم إزاي النهارده يحبوك وبكره يكسروك وبعده يمشوا كأنك ما كنتش في حياتهم أصلاً بتوصل في لحظة معينة وتقول خلاص كفاية مش عايز أشرح نفسي مش عايز

أثبت حقي مش عايز أكون موجود في أماكن مش ليا ولا في قلوب نصها فاتح للناس ونصها مقفول في وشي مش عايز أكمل في دوامة الأخذ والعطاء اللي عمري فيها ما أخدت قد اللي اديته العزلة ساعات بتبقى آخر ملجأ للإنسان اللي اتوجع كتير ومبقاش عايز وجع جديد ولا جرح من نفس اليد اللي مسكتها بثقة قبل كده ساعات بتبقى الطريقة الوحيدة إنك تسمع صوتك من تاني تتعامل

مع نفسك من غير ما حد يضغطك ولا ينتقدك ولا يستغلك ولا يكسرك ساعات بتبقى الفرصة الوحيدة إنك ترتاح من أداء دور الشخص القوي اللي متوقعين منه يتحمل ويتفهم ويسامح دايما حتى وإنت جواك بتنزف وما حدش شايف النزيف ده غير ربنا
في العزلة بتعرف تقول لأ لأول مرة من غير ما تخاف وبتعرف تختار اللي يدخل حياتك بناء على قيمته مش بناء على حاجتك

للناس وبتتعلم إن السلام الداخلي أهم من الفرح الصاخب وإن راحة بالك أثمن من كل الضجيج اللي كنت فاكره حياة العزلة مش هروب العزلة علاج مؤقت بيوقف النزيف لحد ما تتلم روحك وترجع تمشي تاني بقلب أهدى وعقل أوضح ونفس أنضج والعزلة دي مش نهاية هي بداية جديدة بداية لنسخة منك ما تتكسرش بسهولة وما تتعلقش بسرعة وما ترجعش لنفس الوجع مرتين ولو حد سأل ليه

بقيت تحب القعدة لوحدك قول له لأن الوحدة عمرها ما أذتني لكن الناس أذتني لأن الوحدة ما كسرتنيش لكن الثقة في غير أهلها كسرتني لأن الوحدة عمرها ما خذلتني لكن البشر خذلوني لأن الوحدة سمعتني لكن العالم كان دايما بيتكلم وما بيسمعش
العزلة اللي بنختارها بإيدينا مش ضعف دي كانت أول مرة تحترم فيها نفسك بجد وأول مرة تحط قلبك في مكان آمن وأول مرة

تسمح لروحك تتنفس من غير ما حد يكممها أو يطفي نورها
ودي كانت أول خطوة حقيقية ناحية الشفاء
حتى لو محدش فاهم
إنت فاهم

المقال السابق

المقال التالي