مقالات

حين تختبرك الحياة علي حافة قوتك بقلم / نشأت البسيوني "جريده الأضواء المصريه "

• بواسطة المغيرة بكرى
• 2026 Jan 19
• 125

حين تختبرك الحياة على حافة قوتك

بقلم/نشأت البسيوني 

في لحظه معينه من العمر بتحس انك واقف على حافة قوتك الحافه اللي لو ميلت عنها شويه تقع ولو رجعت عنها شويه تتهزم ولو فضلت مكانك هتتعب ومع ذلك بتكمّل لانك ما اتعودتش غير انك تواجه وتنظر للوقت في عينه كأنك بتتحداه كأنك بتقوله مهما طوّلت عليا انا اقدر اقف من تاني يمكن ما حدش يعرف حجم الحرب اللي جواك ولا حجم الضغوط اللي فوق صدرك ولا المعارك اللي بتخوضها وانت ساكت عشان ما تكسّرش حد حواليك ولا تِبَيّن ضعفك قدام اللي ما يستحقش يشوفك واقع لكن انت جواك عالم كامل مليان صبر واصرار وجرح ما بينامش وامل ما بيموتش وافكار بتصارع بعضها ليل ونهار واصرار عنيد مش راضي ينطفي مهما الدنيا بتدوّرك في دايره ما لهاش آخر
في الأيام اللي بتتجمع عليك كأنها كتف في كتف في الأيام اللي بتنزل عليك مره واحده كأنها عاصفه ما بتديش فرصه تتنفس في الأيام اللي بتحس فيها انك مش ماشي لوحدك لكن شايل جبال على ظهرك جبال ما حدش شايفها غيرك ساعتها بتحس قد ايه انت قوي من غير ما تنتبه بتحس انك لسه واقف رغم الهزيمه اللي حاولت تضربك من كل اتجاه ورغم الاحباط اللي وقف على بابك ورغم الخذلان اللي اتسرب من ناس كنت شايف فيهم امانك لكن سبحان الله تقف وتبص حواليك وتلاقي نفسك ما زلت موجود ما زلت ثابت ما زلت ماسك روحك بيدك ما سبّتش نفسك للوجع ياكلها ولا سمحت للوقت يكسرك
ويمكن القوه الحقيقيه مش انك ما تقعش يمكن القوه هي انك تقع وتقوم وتقع وتقوم مية مره وتتعلم من كل مره حاجه جديدة تعلمك ازاي تتمسك بوجودك ازاي تحفظ روحك من الانهيار ازاي تحارب وانت مرحول نصفك اتكسر ونصفك التاني بيحاول يلم الشروخ دي بأيده
ويمكن اعظم حاجه فيك انك ما فقدتش قلبك رغم كل اللي اتاخد منك رغم الغدر اللي شفته رغم الناس اللي ما قدّروش قيمتك رغم الطرق اللي ضعت فيها لوحدك يمكن اعظم حاجه انك لسه قادر تحب وتسامح وتكمل وتبني نفسك من الصفر حتى وانت فاقد نص روحك
وانك في عز التعب لسه بتبص للسماء وتقول يا رب وما دام لسه بتقول يا رب يبقى الخير جاي مهما اتأخر والفرج جاي مهما طال والطمأنينه راجعه مهما غابت لأنك لسه ماسك في رحمة ربنا اللي ما بتتأخرش واللي دايما تيجي في اللحظه اللي بعدها ما تعرفش ازاي كنت هتكمل
انت مش مجرد انسان بيعيش انت قصه بتتكتب بالحرب والصبر والهزيمه والانتصار قصه مليانه شروخ بس الشروخ دي هي اللي علمتك تبقى قوي قصه مليانه وجع بس الوجع ده هو اللي خلاك تفهم الدنيا على حقيقتها قصه مليانه سقوط بس السقوط ده هو اللي خلاك تقف دلوقتي اقوى من كل مره فاتت
الحياه بتختبرك على حافة قوتك عشان تعرفك انك اقوى مما كنت فاكر وانك مهما هزمتك الايام يفضل فيك حاجه ما تعرفش تموت حاجه اسمها الاصرار حاجه اسمها الكرامه حاجه اسمها الايمان بالفرج حاجه اسمها انت

• الوسوم
• حين
• تختبرك
• الحياة
• علي
• حافة
• قوتك
• بقلم
• /
• نشأت
• البسيوني
• "جريده
• الأضواء
• المصريه
• "
• حين تختبرك الحياة علي حافة قوتك بقلم / نشأت البسيوني "جريده الأضواء المصريه "