مقالات

المكان اللي عمر حد ماوصله بقلم / ناني عادل " جريده الأضواء المصريه"

• بواسطة المغيرة بكرى
• 2026 Jan 29
• 20

المكان اللي عمر حد ما وصله

بقلم/ناني عادل 

في زاوية من زوايا الحياة في مكان مش موجود على أي خريطة ولا على أي طريق معروف فيه منطقة محدش يقدر يوصل لها غير اللي مر بتجارب ما تتوصفش ولا تتعاد ولا تتشرح المكان ده جوا الانسان نفسه جواه هو بس لا حد يقدر يدخل عليه ولا حد يقدر يعرف عمقه الحقيقي غير اللي عاش عمر طويل ما بين سقوط ووقوف ما بين ضعف وقوة ما بين خوف وشجاعة
المكان ده مش بيتبني في يوم ولا بيتشكل في شهر ده بيتخلق من تراكم سنين من الليال اللي بيعدي فيها الواحد وهو مش فاهم هو رايح فين ولا ليه بيكمّل ولا ليه بيقاوم بس رغم كل حاجة كان بيكمّل من غير ما يحس لأن روحه كانت بتسوقه حتى وهو مش شايف قدامه غير ضباب
وفي كل مرة يفشل فيها او ينكسر فيها كان جزء صغير جواه بيتقوى جزء صغير بيتعلم جزء صغير بيبني حتة من المكان اللي محدش يعرف عنه حاجة ولو تجمعوا كلهم يبقى ده مخزن الاسرار مخزن التجارب مخزن الدموع اللي نزلت ومحدش شافها والضحكة اللي طلعت وهو مجروح والليالي اللي نام فيها وهو مش قادر يشرح حاجة لحد
المكان ده هو اللي بيخلي الانسان مختلف هو اللي بيخليه يعرف يختار ويفرق ويشوف اللي غيره ما يشوفهوش لانه شايف الدنيا بعين شافت كتير واتصدمت كتير واتعلمت كتير وبقت فاهمة ان الحياة مش معركة قوة بس الحياة معركة صبر ومعركة عقل ومعركة روح لازم تبقى مستعد لها بكل طبقاتك اللي اتكونت من اللي فات
ومع كل ده تلاقي فيه لحظة معينة الانسان يوقف فيها ويعرف ان الرحلة اللي مشيها كلها ما كانتش صدفة ولا عبث وان كل تعب مر بيه كان بيكوّن الطريق ده وكل درس اتعلمه كان بيضيف درجة جديدة على سلم صعوده وكل حاجة راحت منه كانت بتفسح مكان لحاجة أحسن حتى لو ما كانش شايف ده وقتها
والأهم من كده ان المكان اللي جوه الانسان ده مش بيتحكم فيه حد ولا يقدر يهده حد هو ملك صاحبه بس ملك روحه ووجعه وتعافيه وانتصاراته وانكساراته ملك كل حاجة خاضها لوحده وهو فاكر إن الدنيا واقفة ضده في حين إنها كانت بتقوّيه من غير ما ياخد باله
ولما الانسان يفهم أهمية المكان ده يعرف انه مش محتاج يثبت حاجة لحد ولا يشرح نفسه لحد ولا يدور على تقدير من حد لانه فهم ان القيمة الحقيقية مش برا القيمة الحقيقية جواه في المكان اللي اتبنى بالصدق وبالدموع وبالصلابة وبالمواقف اللي ما حدش يعرف عنها حاجة
وفي آخر الرحلة ييجي وقت يبتسم فيه الانسان ابتسامة مش عشان الدنيا اتظبطت لا ابتسامة عشان فهم نفسه أخيرًا فهم مكانه فهم قوته فهم مكانه اللي محدش وصله غيره وفهم ان اللي جاي يستاهل الطريق الطويل ده كله

• الوسوم
• المكان
• اللي
• عمر
• حد
• ماوصله
• بقلم
• /
• ناني
• عادل
• "
• جريده
• الأضواء
• المصريه"
• المكان اللي عمر حد ماوصله بقلم / ناني عادل " جريده الأضواء المصريه"