مقالات

حين تتغير المسافة داخل القلب بقلم : نشأت البسيوني " جريده الأضواء المصريه "

• بواسطة المغيرة بكرى
• 2026 Jan 31
• 106

حين تتغير المسافة داخل القلب

بقلم/نشأت البسيوني 

في لحظة محددة من العمر يكتشف الإنسان إن المسافة اللي جوه قلبه بتتغير من غير ما ياخد باله المسافة اللي كانت قريبة بتبعد والمسافة اللي كانت بعيدة بتقرب والمشاعر اللي كان فاكرها ثابتة بتتهز والناس اللي كان شايفهم أمان يتحولوا لسؤال واللي كان شايفهم مجرد عابرين يبقوا أثبت من الزمن نفسه وكأن القلب بيعيد ترتيب كل شيء حسب اللي يستحق مش حسب اللي اتعودنا عليه
القلب مش بيتغير عشان تعب ولا عشان صدفة ولا عشان حد غلط القلب بيتغير لما يفهم الحقيقة الحقيقة اللي بنهرب منها سنين لحد ما تجبرنا على مواجهتها إن مش كل وعد ينفع يبقى عهد وإن مش كل قرب ينفع يبقى حب وإن مش كل مشاركة معناها اهتمام ناس كتير موجودة في حياتك بالصوت بس لكن وجودها الحقيقي صفر وناس تانية صامتة لكن وجودها أغنى من ألف كلمة
المسافة داخل القلب تتغير لما تدرك إنك كنت بتمد إيدك لحد مش شايفك وإنك كنت بتدي روحك لحد مش مقدرك وإنك كنت بتنتظر كلمة من شخص عمره ما فكر يقولها المسافة تتغير لما تفوق وتلاقي إنك كنت بتتعلق في هواء مش في إنسان وإنك كنت بتخسر نفسك عشان تكسب حد مش حاسس بالخسارة ولا فاهم قيمتك
ولما المسافة تتغير تحس إن القلب نفسه بيعيد بناء جدرانه بيشيل اللي أذاه بدون صراخ ويحافظ على اللي حبه بدون شروط ويخلي مساحة لنفسه قبل أي حد لأن القلب اللي ما يعرفش يحب نفسه عمره ما يعرف يحب حد بجد والمسافة الجديدة اللي بتتكون جوه القلب مش قسوة ولا غرور دي نجاة نجاة من إنهاك طويل ومن انتظار أطول ومن طيبة اتاخدت ضعف واتفسرت غلط
وفي اللحظة اللي يتغير فيها قياس المشاعر يبدأ القلب يشوف بوضوح يعرف إن اللي بيفكر فيك من غير ما تمد له إيدك أغلى بكتير من اللي ما يحسش بيك إلا لما تتألم يعرف إن اللي واقف جنبك في أسوأ أيامك أهم ألف مرة من اللي يضحك معاك في يوم واحد ويمشي يعرف إن الاهتمام مش كلام وإن القرب مش وجود وإن الحقيقة مش دايما حلوة لكن عمرها ما تجرح قد الخديعة
 يفهم الإنسان إن المسافة اللي تتغير داخل القلب مش خسارة بل خلاص خلاص من حمل زيادة ومن ناس وجودها كان عبء ومن علاقات كانت بتاخد وما بتديش ومن مشاعر كانت بتوجعه أكثر ما بتسعده المسافة الجديدة بداية جديدة بداية راحة ووضوح ونضج بداية إن القلب يعرف قيمته ويعرف مين يستحق البقاء ومين كان مجرد محطة في الطريق

• الوسوم
• حين
• تتغير
• المسافة
• داخل
• القلب
• بقلم
• :
• نشأت
• البسيوني
• "
• جريده
• الأضواء
• المصريه
• "
• حين تتغير المسافة داخل القلب بقلم : نشأت البسيوني " جريده الأضواء المصريه "