مقالات

ترميم

• بواسطة يحي الداخلى
• 2026 Apr 14
• 64

ترميم

بقلم/نشأت البسيوني 

في وقت ما تلاقي جواك شروخ صغيرة ما كنتش واخد بالك منها شروخ اتكونت من كلمة قللت منك ومن موقف كسر فيك ومن علاقة استهلكتك ومن صبر طال أكتر من اللازم ومن محاولات كنت فيها بتصلح كل حاجة إلا نفسك وتبدأ تحس إنك محتاج توقف محتاج تراجع محتاج ترجع تمسك قلبك بإيدك وتفهم هو ليه بقى تقيل بالشكل ده وليه اتغير شكله وليه ما بقاش يحتمل نفس اللي 

كان بيعديه زمان وتسأل نفسك هو امتى اتكسرت كده وامتى بقيت بتمشي بعافية وامتى بقيت بتسكت مش علشان حكمة لكن علشان ما بقتش قادر تواجه وامتى بقيت بتمثل الصلابة اللي ما بقتش حقيقية ومع التفكير تفهم إن اللي جرى لك مش بسيط وإن الروح لما تتعب مش بتزعق لكنها بتتسرب منك في شكل ملل وفتور وخسارة شغف وتقل مش مفهوم وإنك محتاج ترميم قبل ما تتفتت 

أكتر وتبدأ خطوة خطوة ترجع تبني نفسك من جديد تبعد عن اللي بيهدمك تقفل باب كان بيدخل ريح باردة جواك تطلع من علاقة ما بقتش أمان تهدى من جهد ما كانش ليه جدوى تبدأ تسمع صوتك بعد ما كان مختفي وتحس إن الترميم مش ضعف زي ما كنت فاكر لكنه قدرة قدرة إنك تعترف بوجعك وتتعامل معاه بدل ما تهرب منه قدرة إنك تعالج اللي انكسر بدل ما تخبيه قدرة إنك توقف وتقول 

كفاية قبل ما تخسر نفسك أكتر ومع كل يوم يمر تلاقي ملامحك بترجع لصفاءها تلاقي روحك بتهدى تلاقي قلبك أخف وتلاقي خطواتك أوضح وتدرك إنك مش بترجع زي الأول لكن بترجع أصلب من زمان وأصدق لنفسك تفهم إن الترميم مش مجرد إصلاح لكنه ولادة جديدة لنسخة منك تستحق حياة أهدى وأعدل وأعمق من اللي فات

• الوسوم
• ترميم
• ترميم