مقالات

تحمل

• بواسطة يحي الداخلى
• 2026 Apr 14
• 66

تحمل
بقلم/نشأت البسيوني 

في مراحل معينة من الحياة تلاقي نفسك شايل أكتر مما تقدر تشيله ساكت أكتر مما تقدر تحكيه واقف رغم إنك من جواك مش ثابت ومكمل علشان ما عندكش اختيار تاني غير إنك تتحمل وتبدأ تسأل نفسك إزاي وصلت للمرحلة دي إزاي بقيت بتحط وجعك على جنب علشان الناس وإزاي بقيت بتسمع شكوى الكل وإنت أكتر واحد محتاج حد يسمعك وإزاي بقيت بتبتسم علشان ما حدش 

يقلق رغم إن قلبك مليان ومع كل يوم يعدي تحس إنك بتتقل شوية وإنك بتشيل هموم مش بتاعتك وإنك بقيت المسؤول عن كل حاجة حتى عن الحاجات اللي محدش بيساعدك فيها وإنك مهما استنزفت نفسك محدش بياخد باله وتيجي لحظة تفقد فيها القدرة على الاحتمال تلاقي نفسك محتاج راحة محتاج كلمة تطيب خاطرك محتاج حضن يطمنك محتاج حد يشيل جزء بسيط من 

الحمل اللي أنت شايله لو حتى بكلمة أو وجود لكن الغريب إنك رغم كل ده بتكمل لأنك اتعلمت تتحمل لأن الظروف علمتك تكون أقوى من اللي بتحسه لأنك فهمت إن الحياة مش دايما عادلة وإن مش كل الناس هتقف جنبك وإن في حاجات لازم تواجهها لوحدك وتبدأ تفهم إن التحمل مش يعني إنك ما تتعبش لكنه يعني إنك تعرف إمتى توقف وإمتى ترتاح وإمتى تقول لأ وإمتى تختار نفسك عن 

إنك ترضي الكل وإمتى تسيب اللي بيهدك بدل ما تفضل شايله ومع الوقت تحس إنك بقيت أقدر على مواجهة اللي جاي وإن قوتك ما كانتش في إنك ما تتكسرش لكن في إنك ترجع نفسك بعد كل كسرة في إنك تعرف توقف رغم التعب وتعرف تبتسم رغم الوجع تكتشف إن التحمل مش عبء لكنه درس درس يعلمك تبقى أرحم بنفسك وأقرب لروحك وأوعى لاختياراتك وإن اللي بيتحمل كتير بيجي يوم ويتغير ويتقوّى ويبني حياة تناسبه مش حياة يهرب منها

• الوسوم
• تحمل
• تحمل