اشعار وخواطر

انطفاء

• بواسطة يحي الداخلى
• 2026 Apr 16
• 16

بقلم/نشأت البسيوني 

في وقت ما تلاقي نفسك مش زي الأول الحماس اللي كان بيشعل جواك بقى أهدى والرغبة في الكلام قلت والاندفاع اللي كان بيخليك تجرب وتغلط وتقوم تاني بقى أقل كأن في جزء منك قرر يهدأ غصب عنه وتبدأ تحس إنك بتتغير بس مش عارف التغيير ده رايح لفين هل هو نضج ولا تعب هل هو وعي ولا استنزاف هل هو راحة ولا انطفاء حقيقي بيبعدك عن نفسك خطوة ورا خطوة 

وتسأل نفسك امتى آخر مرة حسيت فيها إنك متحمس بصدق امتى آخر مرة ضحكت من قلبك امتى آخر مرة عملت حاجة لنفسك مش علشان واجب أو علشان ترضي حد أو علشان تكمل يومك وخلاص
ومع التفكير تلاقي إن في حاجات كتير سحبت منك طاقتك مواقف ما اتعالجتش علاقات استنزفتك ضغوط اتكدست جواك سكوت طويل خلاك تكتم أكتر ما تعبر لحد ما بقى في هدوء مش مفهوم

وتبدأ تخاف من الفكرة دي تخاف إنك تكون بتطفى من جواك ببطء وتخاف إنك ما ترجعش زي الأول وتخاف إنك تكون خسرت جزء منك من غير ما تاخد بالك لكن مع الوقت تفهم إن الانطفاء أحياناً بيكون رسالة مش نهاية رسالة بتقولك إنك محتاج توقف إنك محتاج تهدأ إنك محتاج تعيد شحن نفسك من غير ضغط ومن غير ناس ومن غير توقعات وتدرك إنك مش لازم ترجع زي ما كنت لكن 

ممكن ترجع أحسن أهدى أصدق أقرب لنفسك مش لنسختك القديمة اللي كانت بتجري طول الوقت من غير ما تسأل ليه وتبدأ خطوة خطوة ترجع لنقاط صغيرة جواك لحاجات بسيطة بتفرحك لسكوت مريح لوقت مع نفسك لقرارات ما فيهاش ضغط لناس بتفهمك من غير ما تستهلكك تفهم إن الانطفاء مش حكم نهائي لكنه فترة إعادة ترتيب وإن النور اللي جواك ما راحش لكنه محتاج فرصة يرجع يشتغل من جديد بطريقتك أنت مش بطريقتهم

• الوسوم
• انطفاء
• انطفاء