ما يتغير دون أن ننتبه بقلم/ناني عادل " جريده الأضواء المصريه "

مقالات

ما يتغير دون أن ننتبه بقلم/ناني عادل " جريده الأضواء المصريه "

ما يتغير دون أن ننتبه

بقلم/ناني عادل

في زحمة الأيام تفتكر إنك ثابت وإن كل شيء حواليك ماشي بنفس الوتيرة لكن الحقيقة إنك بتتغير من غير ما تحس تفاصيل صغيرة بتتحرك جواك وتغير طريقة نظرتك للحياة من غير ما تلاحظها غير لما توقف فجأة وتراجع نفسك وتشوف قد ايه اتبدلت
تكتشف إن الكلام اللي كان يضايقك زمان بقى عادي وإن المواقف اللي كانت تكسر فيك بقت مجرد لحظات بتعدي وإن الأشخاص اللي كنت متعلق بيهم ما بقاش ليهم نفس الأثر وإنك تعلمت تمسك في نفسك قبل ما تمسك في حد
وتلاقي إنك بقيت أهدى في أماكن كنت تنفعل فيها وبقيت أكثر حذراً مع ناس كنت بتديهم أمان كامل وبقيت أصدق في إحساسك أكتر من الوعود اللي اتقالتلك وتعلمت إن الطيبة مش ضعف وإن الحذر مش قسوة لكنه وعي اتبنى من التجارب
ومع الوقت تعرف إن التغيير الحقيقي مش بيجي فجأة هو تراكم لحظات صغيرة موقف علّمك وجملة فتحت عينك ووجع خلاك تعيد ترتيب أولوياتك وصمت طال أكتر مما يجب لحد ما فهمت إنك محتاج تمشي خطوة مختلفة
تكتشف إنك اتغيرت فعلاً من غير ما تعمل ضجة ولا إعلان لكنك اتغيرت بالشكل اللي يناسبك وبالطريقة اللي تخليك أقوى وأهدى وأقرب لنفسك وإن أجمل التغييرات هي اللي بتحصل في العمق دون ما يلاحظها أحد غيرك