نقطة لا تعود بقلم/نشأت البسيوني "جريده الأضواء المصريه "

مقالات

نقطة لا تعود بقلم/نشأت البسيوني "جريده الأضواء المصريه "

نقطة لا تعود

بقلم/نشأت البسيوني

في لحظة معينة الإنسان بيعدي من خط ما بيتشافش خط مش مرسوم على الأرض لكنه بيتحفر جواه من كتر اللي شافه واللي فهمه واللي سكت عليه اللحظة دي مش صوت عالي ولا حدث كبير لكنها قرار داخلي هادي يقول خلاص
قبل اللحظة دي الإنسان بيحاول يصلح يبرر يستحمل يدي فرص تانية وثالثة ويقنع نفسه إن الأمور ممكن تتغير وإن اللي قدامه هيفهم وإن اللي جواه هيهدى لكن مع كل محاولة بيخسر جزء صغير من طاقته ومن رغبته في الاستمرار
لحد ما ييجي وقت يلاقي نفسه واقف من غير مجهود مش بيحاول ولا بيقاوم ولا حتى زعلان زي الأول كأن الإحساس نفسه اتغير وكأن الحاجة اللي كانت تقيلة بقت بعيدة عنه من غير ما يتحرك خطوة
النقطة دي مخيفة للي حواليك لأنهم بيشوفوا هدوءك غلط ويفتكروا إنك بقيت قاسي أو بارد لكن الحقيقة إنك وصلت لمرحلة ما عادش ينفع فيها الرجوع ولا ينفع فيها التمثيل
وفي المرحلة دي الإنسان بيبقى صادق بشكل غريب صادق في اختياره وصادق في بعده وصادق حتى في سكوته لأنه مش محتاج يشرح ولا يثبت حاجة لحد هو بس محتاج يكمل بطريقه
يفهم إن نقطة اللاعودة مش نهاية علاقة ولا نهاية حكاية لكنها نهاية نسخة قديمة منه نسخة كانت بتستحمل أكتر مما لازم وتدي أكتر مما تستحق
ومن بعدها يبدأ يمشي بخفة
مش علشان الدنيا بقت أسهل
لكن علشان هو بقى أوضح
وعرف إن الرجوع أحياناً مش ضعف
لكن البقاء في المكان الغلط هو الضعف الحقيقي