اشعار وخواطر

الرجل الذي كان يبتسم دائما

• بواسطة يحي الداخلى
• 2026 Jun 07
• 58

بقلم الكاتب الصحفي وشاعر البسطاء سعيد سعيد أمام 

كان ماشي في وسط الزحمة زي أي واحد من البشر

لا لابس ثوب الأبطال ولا شايل فوق كتفه قمر

بس كان في عينيه حكاية وفي ملامحه ألف عبر

وكانت ضحكته رغم التعب تسبق كلامه قبل النظر

كل يوم يخرج من بيته شايل هموم قد الجبال

لكن عمر الناس ما شافته واقف يشتكي من الحال

يصافح ده ويطمن ده ويهون على صاحب السؤال

كأنه متفق مع قلبه ما يعرفش غير التفاؤل مجال

سألوه مرة إزاي تضحك والدنيا قاسية

قال لهم يمكن لو زودت حزن عليها تبقى أكتر شراسة

أنا ماليش غير قلبي لو كسرته بإيدي مين يداوي قسوته القاسية

يبقى أزرع فرحة صغيرة يمكن تكبر في يوم وتبقى واحة واسعة

كان يعرف إن الحياة مش كلها ورد وأمان

وإن الطريق مهما طال لازم يمر عليه دخان

وإن البشر مش نسخة واحدة فيهم الوفي وفيهم الخوان

لكن كان دايمًا يختار يبص للنور مهما بان

في ليلة برد طويلة غاب الرجل من غير كلام

ما سابش بيت ولا كنوز ولا أرض ولا أرقام

لكن ساب سيرة طيبة تمشي على لسان الأنام

وساب ذكرى تقول للناس إن أجمل ميراث هو الاحترام

بعده فهمت معنى كبير كان مستخبي وسط الزحام

إن الإنسان مش بطول عمره ولا بكثرة ما يملك من أحلام

الإنسان يعيش في قلوب غيره لما يزرع خير وسلام

ولما يرحل يبقى أثره شاهد عليه أكتر من ألف اسم وعلام 

كلمات وتأليف شاعرالبسطاء سعيدسعيدامام

• الوسوم
• الرجل
• الذي
• كان
• يبتسم
• دائما
• الرجل الذي كان يبتسم دائما