قضايا

هل فعلا أول ماأ سحب المحضر كل الأقنعة سقطت

• بواسطة يحي الداخلى
• 2026 Jun 13
• 11

كتب يحي الداخلى

إياد طالب ثانوية عامة اتصل بإبن خاله وقاله أنا جايلك في الكمبوند وابن خاله اكبر منه بسنة وعنده سيارة . راح إياد وقابل ابن خاله اللي كان معاه صحابه ، ابن خاله قاله مفيش مكان ليك في السيارة اقعد علي كبوت العربية وهنمشي بالراحة وهيا مسافة صغيرة داخل الكمبوند ،  إياد وثق فيه ، الأب بيقول : ( يعني ابن خاله ركب ٧ اغراب في السيارة وركب قريبه علي الكبوت ) . والصـ.دمة واول ما إياد قعد علي الكبوت ابن خاله داس بنزين جامد وفضل يتحرك بسرعة بالسيارة يمين وشمال ويضحكوا ويصوروا ، وبعدها إياد مش فاكر حاجة لأنه لما فاق لقي نفسه في العناية المركزة في المستشفي . إياد قلبه وقف ٣٦ ثانية وحصله كسر في الجمجمة مع فقدان السمع والدكاترة والتمريض كلهم قالوا حصلت معجزة لأن الكل كان متوقع إياد مش هيقوم تاني . إياد لما فاق لقي ماية نازلة من ودانه وشاف والدته بتحرك شفايفها وبتتكلم لكنه مش سامع حاجة خالص وأدرك إنه فقد السمع وحاول يتماسك علشان ميزعلش أهله . إياد قال لوالدته إنه مش سامع وبدأوا يكتبوله علي الورق ويسألوه إيه اللي حصل وحكالهم كل حاجة . إياد قبل ما يفوق خاله كان بيزوره كل يوم ويبكي ويقول انا أساءت تربية ابني وهبيع العربية سبب المشاكل وكمان قال  لوالدة إياد إن اياد كان قاعد في شنطة العربية علي غير الحقيقة . لكن اعترف بعد كدة إن ابنه غلطان وأنه شاف بنفسه الفيديو اللي صوروه وهو إياد بيقع وبيضحكوا . والدة إياد عملت محضر لإبن أخوها وبعدها راحت اتنازلت وهيا مش عارفة ابنها هيقوم تاني ولا لاء لكن قالت مش معقول هحبس ابن اخويا . وبعدها إياد فاق وخاله وابن خاله اختفوا من المشهد وقطعوا التواصل بعد تنازل الأم ومش بس كدة دول كانوا بيكتبوا إهانة ليهم علي وسائل التواصل بحسب أقوال الأب والأم . والد إياد بيقول : أنا بموت كل يوم ابني دخلت عليه يوم الحادث لقيته قاطع النفس وبفردة شوز واحدة والدكاترة كلها بتجري وأنا مش فاهم حاجة لقيتهم بيقولوا  danger danger. ابني مصلي ومتعلم في مدارس لغات ومؤدب ، احنا في معاناة يومية ، كان نفسي ادخله  الكلية الحربية ،  ابني بيسمع كلمة وعشرة لاء. ابني غيروا مساره التعليمي وزواج ومستقبل وكل حاجة ، ابني جبتله مدرس في البيت السماعة بتفصل والمدرس بيكمل الحصة كتابة ، ابني ذنبه إيه ؟ ! ابني في معاناة وهو ابنهم بيسافر وبيتفسح وعايش حياته وقطع علاقته بينا . بيقول كمان انا عرفت حاجات كتير الولد ده كان بيأذي ابني وابني مكانش بيحكيلي  مثلا مرة كانوا في البحر وابن خاله لقي زجاجة خدها وعور بيها إياد وقاله بهزر معاك ومرة تانية مسك التيشرت اللي لابسه وقاله ايه الحلاوة دى وقطعله التيشرت ومرة حلقله شعره وهو نايم . ولما سألوا إياد ليه كنت مستحمله قال متربيين مع بعض وصحاب من الطفولة وبيحبه . اما الأم المكلومة بتقول :

أول ما سحبنا المحضر كل الأقنعة سقطت

 وشت موني علي وسائل التواصل ، أخويا قالي ابني غلطان ووراني الفيديو علي الموبايل و اياد بيقع واتدحرج علي الارض ٣ مرات وفاكرينه بيهزر وقعدوا يصوروه ويضحكوا لغاية ما الأمن بتاع الكمبوند هو اللي اتصل بالإسعاف وهما متصلوش بوالده عشان يلحقه وراحوا مستشفي المقطم ورفضته وبعدها مستسفي في التجمع لغاية ما الحالة ساءت . ابني قالي نسيت اصواتكم القديمة يا ماما ، ليه ابني يعيش بريموت كنترول ، الطيب بيعملوه نمرة ويتنمروا عليه ، مش مصدقة ان ابن اخويا اللي عمل فيه كدة . كنت بخاف أخليه يروح معاه أبوه قالي سيبيه ده ابن خاله وهيخاف عليه لقيت ابن خاله هو اللي أذاه اكبر أذي في حياته ، ومقدروش ان انا اتنازلت. والد إياد قالي أنا إيه ذنبي إن اخواتك ضيعوا ابني انا هعمل قضية وهجيب حق ابني . وطبعا حق الرد مكفول للطرف الآخر .

• الوسوم
• هل
• فعلا
• أول
• ماأ
• سحب
• المحضر
• كل
• الأقنعة
• سقطت
• هل فعلا أول ماأ سحب المحضر كل الأقنعة سقطت