مين المستفيد من سرقة عقول البشر

اشعار وخواطر

بقلم الكاتب الصحفي وشاعر البسطاء سعيدسعيدامام

مين المستفيد من سرقة عقول البشر

مين اللي بيزرع الضوضا في كل طريق ويخاف من لحظة هدوء يفوق فيها الفكر

مين اللي كل ما يشوف إنسان بيقرا كتاب يرمي قدامه ألف شاشة وألف حكاية وألف خبر

مين اللي كل ما يلاقي بيت دافي يحاول يسرق منه القعدة ويبدلها بصوت عالي وصورة من غير أثر

مين اللي قال للناس خلي عينك مفتوحة طول الليل وسيب عقلك نايم لحد الفجر

مين اللي كسب لما بقى الطفل يحفظ أسماء الراقصين

وينسى أسماء العلماء والمفكرين

ومين اللي كسب لما بقت البنت تدور على إعجاب غريب أكتر من احترام أقرب الناس ليها

ومين اللي كسب لما بقى الأخ يصور بدل ما يستر
والزوج يشجع بدل ما ينصح والأب يضحك على اللي كان زمان يتكسف منه

مين اللي علمنا نقيس قيمة الإنسان بعدد المشاهدات ونسي إن الرجال تتعرف بمواقفها وإن الستر عمره ما كان موضة قديمة

مين اللي بيبيع الخوف الصبح ويبيع الأمل بالليل ويقبض من الاتنين

مين اللي كل ما الناس تختلف يكسب أكتر وكل ما تتجمع يخسر أكتر

أكيد فيه مستفيد
أ كيد فيه مستفيد

لأن العمر اللي بيضيع بيتحول في مكان تاني لأرباح

والوقت اللي بيتسرق من بيت فقير بيبني في حتة تانية قصور

والعقل اللي ينشغل بالتفاهة يسيب مكانه للي يفكر بداله

عشان كده كل يوم ضجة أكبر من اللي قبلها

وكل يوم حكاية تخبي حكاية

وكل يوم ترند يدفن سؤال

وكل يوم صورة تغطي على حقيقة

لكن اسمعها من شاعرالبسطاء شاعر غلبان اسمه سعيدسعيدامام

أخطر سارق مش اللي يدخل بيتك من الشباك

أخطر سارق هو اللي يخليك تفتح له الباب
بإيدك وتفرح بوجوده وتدافع عنه وهو بيسرق أغلى ما تملك

يسرق وقتك
ايويسرق وقتك

يسرق تركيزك

يسرق أولادك

يسرق حلمك

يسرق حقك في إنك تفكر بنفسك

وفي الآخر يقولك

أنا مالي

أنا مجرد وسيلة

لا يا صاحبي

الوسيلة بريئة

لكن اللي حوّل الإنسان لبضاعة

والعقل لسوق

والضمير لإعلان

هو أول واحد لازم يقف قدام مراية الحقيقة

وأنا هفضل أسأل
مره واتنين وكتير

مين المستفيد من سرقة عقول البشر

لحد ما كل واحد يبص حواليه ويعرف

ويعرف
إن أخطر سرقة في الزمن ده

مش سرقة الجيوب

ولا سرقة البيوت

أخطر سرقة

هي سرقة الإنسان
من نفسه

مين المستفيد لما يبقى الصدق غريب والكدب هو اللي ليه جمهور

ولما صاحب المبدأ يتحارب وصاحب الضجة يتصدر للنور

مين المستفيد مين المستفيد لما يبقى العقل أسير

والترند هو اللي يصدر الدستور

ولما كلمة عالم تتوه وسط ألف مهرج وألف ممثل وألف مأجور

مين المستفيد لما كل يوم يطلع بطل من ورق يبيع للناس حلم مكسور

ولما الشاب يحلم يبقى مشهور قبل ما يحلم يبقى ناجح أو يبني أو يعمر أو يطور

مين المستفيد لما تبقى البنت سلعة في سوق الإعجاب

وكل واحد يسعرها على مزاجه وسط الكلاب

ولما الأخ ينسى إنه سند ويبقى أول واحد يفتح باب الفرجة عليها

ولما الزوج ينسى إن الرجولة ستر ويحول بيته لمسرح والناس فيه جمهور

مين المستفيد لما الكلمة الرخيصة تكسب والكلمة الشريفة تتحارب

ولما صاحب الضمير يبقى غريب وسط زمن بيطبل لكل صوت عالي وكبير

أكيد فيه تاجر كبير
أكيد فيه تاجر كبير

مش بيبيع قماش ولا دهب

ده بيبيع الوهم
ويشتري الوقت

ويقبض من كل لحظة شرود

ويفرح كل ما الإنسان ينسى نفسه

لأن الإنسان الواعي صعب ينضحك عليه

وصعب ينجر ورا كل دقيق

وصعب يبيع ضميره

عشان كام تصفيقة

أو كام ألف مشاهدة

وأنا هفضل أسأل

مين المستفيد

مين المستفيد
لحد ما كل واحد يفتش جوه عقله

ويعرف

ويعرف إن الحرية مش إنك تعمل اللي يعجبك

الحرية
إن محدش يعرف يشغلك

ويوقف عقلك

بزر واحد

بقلم الكاتب الصحفي وشاعر البسطاء سعيدسعيدامام

المقال السابق

المقال التالي