اشعار وخواطر

بعد ما أموت

• بواسطة يحي الداخلى
• 2026 Aug 01
• 31

بقلم الكاتب الصحفي وشاعر البسطاء
سعيد سعيد امام

بعد ما أموت ما تبكوش عليا كتير ولا تعدوا الدموع ولا السنين

قولوا يا رب اغفر لعبد كان نفسه يعيش بقلب أمين

وكان كل حلمه يسيب في الدنيا أثر طيب بين الخلق أجمعين

وكان يشوف البسمة على وش غلبان أغلى من كنوز الملايين

بعد ما أموت ما تسألوش ساب كام ولا كان يملك إيه من زينة السنين

اسألوا كام قلب جبر خاطره وكام يتيم حس بالأمان بعد تعب السنين

اسألوا كام كلمة طيبة خرجت من قلبه وكانت بلسم للموجوعين

وكام دعوة طالعة من قلب أم كانت سبب في رضا رب العالمين

بعد ما أموت لو جيتوا تزوروا قبري اقرو الفاتحة بإخلاص ويقين

الدعوة الصادقة عند رب كريم أغلى من ورد الياسمين

الورد يوم ويدبل وترابه يطير مع أول هبة هوى وأنين

لكن الدعوة تفضل نور في القبر ورحمة لحد يوم الدين

بعد ما أموت سامحوني لو يوم زعلت حد من غير قصد أو تلوين

يمكن الوجع كان أكبر مني ويمكن التعب سرق مني الحنين

ورب القلوب وحده يعلم خبايا الصدر وما بين العين والعين

ويعلم إن النية كانت خير حتى لو خان  التعبير من التعب في الوقت والحين

بعد ما أموت افتكروا إن الإنسان مش بيعيش بطول السنين

الإنسان يعيش بسيرته الحلوة وكلمة الخير بين الصالحين

لا مال يدوم ولا جاه يبقى ولا يبقى غير وجه رب العالمين

ويبقى العمل الصالح شاهد على صاحبه بين الخلق أجمعين

بعد ما أموت لو شفتوا طفل يتيم امسحوا على راسه بحنان ولين

ولو شفتوا أم شايلة هم الدنيا قولولها ربنا يعين

ولو شفتوا راجل مكسور الخاطر سندوه بكلمة من القلب المتين

يمكن خير صغير تعملوه يكون سبب في رحمة رب العالمين

بعد ما أموت خلو باب بيتي مفتوح لكل غريب ولكل مسكين

وخلو الخير عادة في حياتكم مش موسم ولا يومين

الخير بيرجع لصاحبه ولو بعد وقت طويل وسنين

ورب كريم لا يضيع أجر قلب عاش للناس بإخلاص ويقين

بعد ما أموت لو جه اسمي مرة بينكم قولوا ربنا يرحم عبد مسكين

كان نفسه يرضي ربه قبل ما يرضي خلقه أجمعين

ولو ربنا قبل منه سجدة في جوف الليل ودمعة من عين حزين

يبقى كسب الدنيا والآخرة حتى لو خرج منها من غير مليم

دي نهاية كل حي مهما طال عمره ومهما عاش بين السنين

ويبقى الأثر هو العمر الحقيقي ويبقى الذكر للناس الطيبين

فاللهم اجعل آخر كلامنا شهادة واجعل آخر أيامنا يقين

واجمعنا بمن نحب في جنة عرضها السماوات والأرض مع النبيين والصالحين

بقلم الكاتب الصحفي وشاعر البسطاء
سعيد سعيد امام

• الوسوم
• بعد
• ما
• أموت
• بعد ما أموت