أخبار مصر

لما امي تكبر

• بواسطة يحي الداخلى
• 2026 Aug 17
• 10

بقلم الشاعر سعيدسعيدامام

لما امي تكبر مين يسند خطوتها
ومين يطمن قلبها ويهون علتها
ومين يفتكر ميعاد دواها وسهرتها
ومين يبوس ايديها ويشكر فضلها
لما امي تكبر والسنين تبان فيها
مين يقول لها يا امي انا نفسي اعيش ليكي
مين يقعد جنبها لو الدنيا تعبتها
ومين يخلي ضحكتها اغلى امانيها
لما امي تكبر وتبقى محتاجة ايد
انا مش هسيبها لو حتى الطريق بعيد
دي اللي سهرت عمري وانا طفل صغير
وعاشت سنينها كلها عشان اكون سعيد
انا فاكر زمان لما كنت صغير
كانت عيني عليها وهي عينها عليا
لو كنت اتعب كانت تسهر لحد الصبح
ولو اخاف كانت تقول لي انا جنبك يا ابني
كبرت انا وكبرت هي معايا
بس انا كنت بجري ورا دنيايا
وهي كانت بتستنى رجوعي للبيت
وتقول لي تعال اقعد شوية معايا
وعدت الايام وانا بقول بكرة
وبكرة بقى سنة وسنة بقت عمر
وفجاة لقيت الشعر الابيض في راسها
ولقيت ايدها اللي كانت قوية بقت ترتعش
ساعتها خفت من حاجة مش عايز اقولها
خفت من يوم الدنيا تيجي وتاخدها
خفت من بيت واسع من غير صوتها
ومن باب يتفتح وما الاقيش مستنياها
يا امي انا عارف اني قصرت كتير
وعارف اني ساعات كنت عنك بعيد
بس والله ما كان البعد من قلبي
دي الدنيا شدتني وانا كنت عنيد
سامحيني لو يوم ردي كان قاسي
سامحيني لو يوم اتاخرت عليكي
انا كل ما اكبر افهم اكتر
ان مفيش في الدنيا اغلى من رضاكي
انا نفسي العمر يقف عند اللحظة دي
وانتي قدامي وانا سامع صوتك
وانا اقول لك حاضر يا امي
وانتي تقولي ربنا يخليك ليا
ولو ربنا كتبلي عمر طويل
نفسي اقضي باقي عمري في رضاكي
اشيل تعبك زي ما شلتي تعبي
واداري خوفك زي ما داريتي خوفي
لما امي تكبر انا اللي هبقى سندها
انا اللي هسهر لو ليلة تعبت فيها
انا اللي هفضل جنبها مهما حصل
لان اللي ربتني ما ينفعش يوم اسيبها
ولما ييجي يوم وتبصلي في عيني
وتقول لي انا تعبت يا ابني
هقول لها ارتاحي يا امي
انا هنا ومش هسيب ايدك تاني
لان الام لما تكبر مش بتكبر في القلب
دي بتغلى اكتر وكل يوم تزيد
ويبقى اغلى حلم عند ابنها
يشوفها بخير ويعيش عمرها سعيد

بقلم الكاتب وشاعر البسطاء
سعيد سعيد امام

• الوسوم
• لما
• امي
• تكبر
• لما امي تكبر