مقالات

ظلال بترجع تحاسب أصحابها بقلم : نشأت البسيوني " جريده الأضواء المصريه "

• بواسطة المغيرة بكرى
• 2026 Jan 23
• 24

ظلال بترجع تحاسب اصحابها

بقلم/نشأت البسيوني 

في لحظات معينه من العمر بتظهر ظلال غريبه حوالينا كأنها جايه من زمان تاني وبتقعد قدامنا من غير صوت ولا كلام وتفضل تبص جوانا وتفتح ابواب احنا افلناها من سنين ابواب اتخزن فيها خوفنا ووجعنا وكلام كتمناه وناس خذلتنا ووعود خلصت قبل ما تبدأ والظلال دي ما بتظهرش صدفة بالعكس بتزورنا لما نكون على حافة الانهيار او على حافة بدايه جديده وكأنها جاية تحاسبنا وتفكرنا ان اللي بنهرب منه لسه واقف ورانا
وتقعد الظلال دي تجمع قصصنا اللي اتدفنت جوا الروح اللي محدش يعرف عنها حاجه غيرنا تجمع لحظات كنا فيها مستضعفين ولحظات وقفنا فيها وبقينا اقوى مما توقعنا وتجمع صدمات عبرت من قلبنا وسابت فيه علامات ما بتمحيش وتجمع صمت طويل اتقل علينا اكتر من الكلام اللي كنا عايزين نقوله بس مقدرناش نقوله وتحط كل ده قدامنا من غير ما تجرح ومن غير ما تواسي بس عشان نشوف ونعرف احنا وصلنا لإيه واحنا بقينا مين
وتبدأ تحاسبنا بطريقتها الصامته تحاسبنا على اللي سمحنا له يوجعنا وعلى اللي سمحنا له يسرق من وقتنا وراحة بالنا وعلى الناس اللي اديناهم مساحات ما استحقوهاش واللي صدقنا كلامهم رغم ان افعالهم كانت بتقول عكسه وتحاسبنا على كل مره بعنا نفسنا عشان نرضي حد ما يستاهلش وعلى كل مره ضحكنا فيها قدام الناس عشان نخبي اللي اتكسر جوانا
وبعد الحساب ده كله تسيب لنا سؤال واحد بس احنا لسه عايشين بنجري ورا مين وبنهرب من ايه واحنا ليه عرفنا نسامح كل الناس وما عرفناش نسامح نفسنا ولا عرفنا نداوي الجرح اللي احنا اللي فتحناه بإيدينا لما صدقنا حاجات كنا فاهمين انها هتنقذنا لكنها غرقتنا اكتر
ومع الوقت نفهم ان الظلال دي مش جايه تخوفنا ولا تعاقبنا الظلال دي جايه ترجع لنا حقيقتنا اللي خبيناها وترجع لنا قوتنا اللي نسيناها وترجع لنا قيمتنا اللي الناس حاولت تقللها وده لان مافيش حد بيقوم من غير ما يتكسر الاول ومافيش حد بينضج من غير ما يتوجع ومافيش حد بيتولد من جديد غير لما يقفل فصل قديم مهما كان صعب
وفي اخر المواجهه دي كلها نقوم على رجلينا من غير صوت ومن غير ما نقول لحد ونعرف اننا مش محتاجين نثبت حاجه لأي حد ولا محتاجين نقنع الدنيا اننا صمدنا احنا بس محتاجين نعرف اننا رجعنا نقف لاننا قررنا نرجع نقف وان الظلال اللي خفنا منها طول عمرنا طلعت اقرب لنا من كل الناس اللي عرفناهم لانها في الآخر كانت الحقيقة اللي هربنا منها كتير لكن كانت هي الوحيده اللي هتنقذنا من نفسنا

• الوسوم
• ظلال
• بترجع
• تحاسب
• أصحابها
• بقلم
• :
• نشأت
• البسيوني
• "
• جريده
• الأضواء
• المصريه
• "
• ظلال بترجع تحاسب أصحابها بقلم : نشأت البسيوني " جريده الأضواء المصريه "