الصلات الضاحكه …هلاوي " جريده الأضواء المصريه "

مقالات

الصلات الضاحكه …هلاوي " جريده الأضواء المصريه "

الصلات الضاحكه .. هلاوي

غايتو لو ما كمية الضحك البنضحكا نحن كأصحاب كان متنا ..
كل صديق بيني وبينو كمية مواقف مضحكه .. مرات لما
اتذكرها اقعد اضحك براي زي الفاكا منو .. برضو في احتمال
وأنا ماجايب خبر ..
من الملاحظات انو أحزن الاصدقاء هم الاكتر ضحك ..
احتمال يكون ده نظام تفريغ
شحنة ألم .. عشان الواحد فينا ما ينفقع ويموت خساره ساي َََ.. كل صاحب من أصحابي عندي معاهو كونتينر بتاع مواقف ضاحكه أو اقلو ترنك
.. بي المناسبه الزول لو ماهو في روحو ذكي ولماح اصلو ما بكون بعرف ينتج لي موقف ضاحك َ.. الضحك في نظري
صناعة الأذكياء وتظل في خصومه ابديه بين الاغبياء والضحكه ..
احلى مافي الصحاب مواقفهم
الضاحكه حتى فكرت كم مره
الم المواقف دي في كتاب .. احتمال ينجح معاي اكتر من الشعر .. او اقول ليكم احسن
اخلي ده بي جمبه .. وده بي
جمبه .. نظام يتشايلو في الدنيا
الوهم دي .. بدل ما ينفرد بي
الشعر ويكمل الباقي من عمري لو فضل فيهو باقي .
مره انا وصاحبي محجوب عبدالحفيظ الله يرحمَو راكبين في بكسي .. زمن البكسي او
البرنسه كانت مواصلات ليها
شنه ورنه .. ويقوم محجوب يدفع للولد الكمساري ويقول
لي اتنين ..
الكمساري بي برءه كده قال لي
منَو ومنو .. راح محجوب بدون
تردد قال لي
عبدالوهاب هلاوي ومحجوب
عبدالحفيظ .. جات محجوب كيف .. انا ما عارف ..
مره انا وصديقي طارق كبلو
جايين نص الليل من دافنة
الاعلامي الشهير حسن ساتي
الله يرحمو ََ.. يقوم طارق يقول لي .. هسه زوجتي تصدق كيف
اني كنت في دافنه ..
قلت لي كان تشيل معاك العنقريب .. ويضحك طارق
لما داير يقلب العربيه يلحقنا
ساتي ..
اعدكم حأحكي واحكي ..
اعيدوني بي كترت الضحك...
بي الذات
في زمن الأحزان الورديه ..